IL ROSARIO DEI FEMMINIELLI...

..DALLA GATTA CENERENTOLA DI ROBERTO DE SIMONE

Nel nomme del padre e comm’è stato da solachianiello è addeventato scarparo e passa nu guaio e passane ruie e passa n’atu guaio e passsane ruie e passatele ciento guaie  E nel primmo mistero ‘e matalena dicennose ‘o rusario ascette prena dicennose ‘o rusario ascette incinta cu na zizza ‘a fora e n’ata arinto  E nel secondo mistero ‘e mmaculata pe se fa na scerriata jetta ‘a fernì dint’a culata po’ venettero ‘e surdate e a scerriajeno dint’a nuttata po’ venettero ‘e mericane e a scerriajeno ‘nmiezo ‘e grare po’ venettero ‘e marrucchine e c’ho ‘mpezzaieno areto ‘e rine  Jamme dicite cummà refrisco e sullievo ‘a bonanema ‘e tatilllo ca saglieva ‘ncuollo a chillo se faceva ‘e gruosse e ‘e pezzerille e s’arrezzavano pure ‘e capille ora pronobbis tutto ‘a mme e niente a isso  Padre nostro fatte ‘na ‘mposta fancella tosta e sia fatta la tua volontà comme arreto accussì annanze piere cosce rine e panza  E mmo dicimme nu refrisco pe’ ll’anema ‘e nunziata ca pure all’atu munno sta ‘nfucata ammen  E nel terzo mistero ‘e ‘ntunettella pe’ ‘nfucà na tianella jetta a fernì sott’ a furnacella po’ venette ‘o solachianiello e se ‘nfucaie ‘o bancariello po’ venette ‘o munaciello e ll’arracquaie ‘e rafanielle po’ venettene e femmenielle ‘e s’agliuttettero ‘e cucuzzielle  Salve regina e chi ‘o ssape chi è sta riggina si è nobile ‘o signurina o si è figlia ‘e mappina a me me vene a sera e a matina ora minute e quarte d’ora avimma fa chest’orazione cu giacumino dint’o stanzino cu pascalotto dint’o salotto cu liberato dint’o scantinato cu ernesto ‘ncopp’a fenesta cu giuvanne sott’o scanno cu austino ‘npont’o scalino cu nicola ‘ncopp’e riggiole cu ntuono dint’o stipone cu lurenzo dint’a credenza cu ndrea ‘ncopp’o lietto ca tuculeia cu alberto sotto ‘e cuperte cu gennaro sott’o fuculare cu vastiano sott’a na funtana cu giruzzo abbascio ‘o puzzo cu liodato dint’o viscuvato cu ggiro mio dint’a sagrestia cu menecone sott’a nu lampione cu peppariello dint’a nu pagliariello cu ludovico sotto ‘a nu pero ‘e fico cu tummaso ‘ncopp‘a n’arbero ‘e cerase cu nunziello ‘nmiezo ‘a nu campo ‘e cucuzzielle e all’ultimo con il re di franza pure si s’abbuffasse ‘a panza basta ca me desse ‘o canzo.